19 ਅਗਸਤ ਨੂੰ ਸੋਨਾ ਜਿੱਤ ਕੇ ਲਹਿਰਾਵਾਂਗਾ ਤਿਰੰਗਾ : ਬਜਰੰਗ

ਨਵੀਂ ਦਿੱਲੀ : ਜਬਰਦਸਤ ਫਾਰਮ ‘ਚ ਚਲ ਰਹੇ ਰਾਸ਼ਟਰਮੰਡਲ ਖੇਡਾਂ ਦੇ ਸੋਨ ਤਮਗਾ ਜੇਤੂ ਪਹਿਲਵਾਨ ਬਜਰੰਗ ਪੂਨੀਆ ਨੇ ਵਾਅਦਾ ਕੀਤਾ ਹੈ ਕਿ ਉਹ 18ਵੇਂ ਏਸ਼ੀਆਈ ਖੇਡਾਂ ਦੇ ਪਹਿਲੇ ਦਿਨ ਸੋਨ ਤਮਗਾ ਜਿੱਤ ਕੇ ਤਿਰੰਗਾ ਲਹਿਰਾਏਗਾ। ਬਜਰੰਗ ਨੇ ਏਸ਼ੀਆਈ ਖੇਡਾਂ ਦੇ ਭਾਰਤੀ ਦਲ ਲਈ ਐਤਵਾਰ ਨੂੰ ਭਾਰਤੀ ਕੁਸ਼ਤੀ ਸੰਘ ਅਤੇ ਨਵੇਂ ਬਣੇ ਪਾਰਟਨਰ ਟਾਟਾ ਮੋਟਰਸ ਵਲੋਂ ਆਯੋਜਿਤ ਵਿਦਾਈ ਸਮਾਰੋਹ ‘ਚ ਇਹ ਗੱਲ ਕਹੀ। ਇਸ ਮੌਕੇ ‘ਤੇ ਕੁਸ਼ਤੀ ਮਹਾਸੰਘ ਦੇ ਪ੍ਰਧਾਨ ਬ੍ਰਿਜ ਭੂਸ਼ਣ ਸ਼ਰਣ ਸਿੰਘ ਅਤੇ ਟਾਟਾ ਮੋਟਰਸ ਦੇ ਮਾਰਕੇਟਿੰਗ ਕਮਿਊਨਿਕੇਸ਼ਨ ਮੁਖੀ ਯੂ. ਟੀ. ਰਾਮ ਪ੍ਰਸਾਦ ਮੌਜੂਦ ਸਨ। ਭਾਰਤੀ ਦਲ ਦੇ ਲਗਭਗ ਸਾਰੇ ਪਹਿਲਵਾਨ ਵੀ ਇਸ ਮੌਕੇ ‘ਤੇ ਮੌਜੂਦ ਸਨ ਅਤੇ ਬ੍ਰਿਜ ਭੂਸ਼ਣ ਨੇ ਉਮੀਦ ਪ੍ਰਗਟਾਈ ਹੈ ਕਿ ਪਹਿਲਵਾਨਾਂ ਦਾ ਪ੍ਰਦਰਸ਼ਨ ਸ਼ਾਨਦਾਰ ਰਹੇਗਾ। ਹਰਿਆਣਾ ਦੇ ਇੱਜਰ ਜਿਲੇ ਦੇ ਬਜਰੰਗ ਨੇ ਇਸ ਸਾਲ ਗੋਲਡ ਕੋਸਟ ਰਾਸਟਰਮੰਡਲ ਖੇਡਾਂ ‘ਚ 65 ਕਿ.ਗ੍ਰਾ ਵਰਗ ‘ਚ ਸੋਨ ਤਮਗਾ ਜਿੱਤਿਆ ਸੀ ਜਦਕਿ ਚਾਰ ਸਾਲ ਪਹਿਲਾਂ ਇੰਚੀਓਨ ਏਸ਼ੀਆਈ ਖੇਡਾਂ ‘ਚ ਉਸ ਨੇ 61 ਕਿ.ਗ੍ਰਾ ਵਰਗ ‘ਚ ਚਾਂਦੀ ਤਮਗਾ ਜਿੱਤਿਆ ਸੀ। ਬਜਰੰਗ ਨੇ ਇਸ ਸਾਲ ਰਾਸ਼ਟਰਮੰਡਲ ਖੇਡਾਂ ਦੇ ਬਾਅਦ ਜਿੰਨੇ ਵੀ ਟੂਰਨਾਮੈਂਟਾਂ ‘ਚ ਹਿੱਸਾ ਲਿਆ ਉਸ ਨੇ ਸਾਰਿਆਂ ‘ਚ ਸੋਨ ਤਮਗਾ ਜਿੱਤਿਆ। ਇਸ ਲਈ ਬਜਰੰਗ ਇੰਡੋਨੇਸ਼ੀਆ ਏਸ਼ੀਆਈ ਖੇਡਾਂ ‘ਚ ਸੋਨ ਤਮਗੇ ਦਾ ਮਜ਼ਬੂਤ ਦਾਅਵੇਦਾਰ ਮੰਨਿਆ ਜਾ ਰਹਾ ਹੈ। ਬਜਰੰਗ ਨੇ ਉਸ ਤੋਂ ਲਗਾਈ ਜਾ ਰਹੀ ਉਮੀਦ ‘ਤੇ ਕਿਹਾ, ” ਕੁਸ਼ਤੀ ਦੇ ਮੁਕਾਬਲੇ ਸ਼ੁਰੂਆਤੀ ਸਮਾਰੋਹ ਦੇ ਅਗਲੇ ਦਿਨ 19 ਅਗਸਤ ਨੂੰ ਸ਼ੁਰੂ ਹੋ ਰਹੇ ਹਨ ਅਤੇ ਮੇਰੀ ਉਮੀਦ ਪੂਰੀ ਰਹੇਗੀ ਕਿ ਮੈਂ ਸੋਨਾ ਜਿੱਤਾਂ ਅਤੇ ਇਨਾਂ ਖੇਡਾਂ ‘ਚ ਤਿਰੰਗਾ ਲਹਿਰਾਵਾਂ। ਸਾਰੇ ਦੇਸ਼ਵਾਸੀਆਂ ਦਾ ਆਸ਼ੀਰਵਾਦ ਅਤੇ ਪਿਆਰ ਮੇਰੇ ਨਾਲ ਹੈ ਜਿਸ ਨਾਲ ਮੈਨੂੰ ਯਕੀਨ ਹੈ ਕਿ ਮੈਂ ਕਾਮਯਾਬ ਰਹਾਂਗਾ।